17.Spieldach: RB Leibzsch gechen Wärdor Brähm: Sonnahmd, 22.Dezembor 2018, 15:30 Uhr

Guddn Dach un herzlisch willgomm,

nachm unriehmlichen 0:1 in Minchen und dor finften Gladdsche, die mir uns auswärds gehold ham, nu also dor fesdliche Jahresabschluss daheeme in dor Schissel.
S Jahr 2018 hadde viele Hehebunggde fir uns Fänns barahd. Angefangn vom Einzuch ins Vierdelfinale dor Eurobalig un dem glorreichen 2:1 iewer de Bayern im Märze bis zu den zwei Eurobabogalduellen gechn Celdigg war alles dabei, was es Leibzscher Fußballhärze begehrde.
Unweicherlicher Wändebunngd in dor Geschichde des Rasenballspords is dor Abschied von unserm alden Chefdrainer Ralph Hasenhiddl im Mai unn die Anginndschung, dass Julian Nagelsmann (versuchd das mal in säggsch zu redn, ihr lachd euch halbscheggsch, s gann mor nur hochdeitsch sachn, egal wie säggsch s gling soll) als unsor neier Goach ab zweedausndneinzn iewernähm soll.
De Brähmer reisen laud agduellor Meinung des Giggor-Magazins ouhne Nuri Sahin, Fin Bardels unn Philibb Bargfrede nach Leibzsch, besondors offbassn missn unsre Bulln, bei denen Schdefan Ilsangger nach nor roudn Garde längre Zeid fehln wärd, offn gefährlischn Brähmer Schdurm um Maggs Gruse, im Middlfeld befindn sich midd Dävie Glasn un Gevin Mehwald äwwnso guhde Schbielor, die fir ä bar glasse Agdion’n guhd sind.
Ralf Rangnigg gann in dor ledzen Aufgabe des Galendorjahrs unner andrem off de gewohnde Elf sedzn, die midd ä bar Änderungn gespiggd sein wärd. S is davon auszugehn, dass Yussuf Baulsen sein zweehundertunerstes Bflichtschbiel fir de Leibzscher (härzlichn Gliggwunsch nachdräglich, Yussi, du bisd ä Wahnsinn, off de nächsdn zweehundert) ärst im Januar gechn Dordmundd beschdreidn wärd. Marceloo Saratschi unn Marcel Sabiddzor wern wohl ihre ledzn Offdridde in diesm Jahr begomm, ewenso Willi Orban. Bedor Gulatschi wärd ooch midd dabei sinn.
Schdadisdiggn:
Gechen Brähm gewann ÄrBe zweemal, beide Male zuhause (3:1 2016/17 durch zwee Dore von Naby Geida unn Dävie Selge, 2:0 2017/18 durch Geida unn Bernardo.). Auswärds holdn unsre roudn Bulln in dor ledzdn Saisong ä Unentschiedn, in dor Saison davor gingn mir 0:3 undor.
Rangniggs ledzde Liga-Niedorlache gechn Wärdor liggd fasd nein Jahre zurigg, damals noch midd Hoffnheim.

In dor Schissl wärn zirga vierzschdausnd Zuschauer zugechen sinn, gibbd noch Gardn.
In diesm Sinne, off e scheenes Spiel am Sonnahmd, frehliche Weihnachdn unn ä guhdn Ruddsch ins neie Jahr.
An alle mitlesenden Bremer Fans: Der Text ist in Leipziger Dialekt verfasst. Ich hoffe ihr nehmts mit einem Augenzwinkern zur Kenntnis
Selbstverständlich auch euch ein frohes Fest und auf ein faires Spiel am Sonnabend.